راجی جُنز ءُ بلوچستان
نبشتہ کار; سیلگ ھریسَن
چمشانک: جان گل بلوچ
پجّار:
نومبر 1977 ءَ کارنیکی انڈومنٹ ءَ اُوگانستان، پاکستان ءُ ایران پہ اھوالکاراں ھترناکیں ھَند گوْشگ اَنت۔ شَش ماہءَ پَد کابل ءَ کمیونسٹ آشوب اَتکگ ءُ 1979 ءَ روس ءِ لشکر ءَ زِر ءَ دور کُتگ ءُ اوگانستان ءَ پُترتگ اَنت۔
انڈومنٹ ءِ اے ملکانی رسانک گریئگ ءِ کار یک اھوال کار ے کہ آئیءِ نام Salig Harrison بوتگ، ھمائی ءَ کُتگ اَنت۔
اولی بَھر
اُوگانستان ءِ آشوب ءِ دیم ءَ آیگ ءَ گوں اوگانستان ءِ تھا روس ءِ پئوج ءِ آیگءَ چہ پیش بلوچستان دُگنیاءِ واستہ یک نزاتنتگیں ءُ درامدیں ھندے بوتگ بلے اوگانستان ءَ روسی پئوج ءِ آیگ ءِ ھمراھی ءَ روبرکتی مُلکانی چمّ بلوچستان ءَ سکّ بوت اَنت۔اے پیم پہ اے ھاترا بوت کہ روس ءَ وتئ چمّ بلوچستانءِ ساھِل ءَ کُتگ اِنت اَنت۔
بلوچستان پاکستان ءِ رو برکت ءِ ءُ ایران ءِ رو درتکءِ یک پراہ ءُ شھگانیں ھَندے که اِیشیءِ رقبہ چہ فرانس ءَ ھم مزنتر اِنت۔ ءُ بلوچستان ءِ ساھِل 900 میل اِنت۔
پاکستان ءُ ایران ءَ ھمے تُرس لاپ ءَ کپتگ کہ روس بگند ۓ بلوچستان ءِ آجو لوٹیں سرمچاراں پہ بلوچستان ءِ آجوئی ءَ کُمک بِہ کنت۔ بلے راستی اِیش اِنت کہ روس بس لوٹ ایت کہ آ ایران ءُ پاکستان ءَ بیھار بدنت ءُ پاکستان ءُ ایرانءَ ھمنچو لاچار ءُ بےوس بکنت کہ آ ساھِلءَ روسءِ دست ءِ بدیئنت۔
بلوچ راجدوستانی جُنزے 1928ءِ وھداں سَر کشّ ایت وھدے کہ بلوچستان ءِ زمین بھر ءُ بانگ کنگ بیت ءُ ٹُکّرے ایران دیگ بیت۔ بُندرءَ اے جُنز بریٹش ءِ ھِلاپ ءَ بِندات بیت۔
دومی بَھر
بازیں زانتکارے بلوچستان ءَ گوں ماہ ءَ ھمتنگ کَنت۔
یک امریکی زمینزانتے ءِ گوشگ اِنت کہ بلوچستان مریخ ءِ نزّیکتریں ٹِکّ اِنت۔
اگاں بلوچستان ءِ زمینءِ گپّءَ بکن ئے گڑاں اے زمین باز پُرارشتیں زمینے۔ مکرانءِ شیرکنیں ھُرماگاں بگر داں بیا شال ءُ زیارت ءِ رنگ رنگیں میوایاں۔ چاگی ءُ دالبندن چہ چیریں زمینی مڈّیاں پُر اَنت۔ سور ءُ تَلا، الماس ءُ دگہ دگہ۔ کوہلو ءُ ڈیرہ بگٹی ءِ زمین ءِ چیر ءَ چہ گیس در کئیت۔ بیلہ، ھاران، ماشکیل ءُ آواران زمینداری ءَ نامان اَنت۔ گوادر گوں پُرارزشتیں نیلیں زِرا وتئ ڈولداری ءِ مَٹ وت اِنت۔ بولان ءِ بلوچی دپتر بہ بیت یا کہ نوشکی، ھاران ءُ ماشکیل ءِ ریگستان بہ بَنت یا کہ ھُزدار ءِ زیبائی بہ بیت دُرست وتئ مٹ وت اَنت۔ کولواہ ءِ پراہ ءُ شاھگانیں کُچّگ ءِ زیبائی، سرجمیں بلوچستان چہ بھشت ءَ کمتر نہ انت۔
اگاں ما بچار ایں بلوچ مالدار بوتگ اَنت ءُ انگت بازیں ھَند ءُ دمگاں ھست اَنت۔ مال ءُ دلوت گیشتر پَس، گوک، میش، ھَر ءُ اُشتر اَنت۔ بلوچی ءَ یک کُھنیں گْوَشتنے ھَست کہ ھر کجُا تو گوکے دیست گُڑا بزاں تو آپ ءِ کِرّ گوران ۓ، اگاں تو ھرے دیست گُڑا بِزاں کہ میتگے ءِ کِرّا ۓ ءُ ھردے تئ دیم ءَ اُشترے کَپت گُڑا بِزاں تو وتئی راہ گار کُتگ۔
اگاں ما دین ءُ مَزھب ءِ گپّ ءَ بکن ایں گڑا بلوچ گیشتر سُنّی، مسلمان ءُ زگریانی مزنیں آبادی یے ھست۔ بلے اسل ءَ بلوچ ءِ تھا مزھب ءُ دینءِ مزنیں چِست ءُ ایر نیست۔
بریٹشءِ ایردستی ءَچہ پیش بلوچ راجی جُنز ءِ تھا سرداری کردار باز گندگگ کئیت، ایشانی لَڑ ءَ
اولی نام میر ءُ مُتبر میر چاکر خان رند اِنت کہ آئی ءَ مکران ءَ بگر داں شال ءَ یک بلوچ ءِ ریاستے جوڑ کُرتگ۔
چاکر ھان ءِ دارالحکومت (مَزن شھر) سِبّی بوتگ کہ آئی ءَ 1487 بگر داں 1511ءَ حکومتی کُرتگ۔
ایشیءِ حکومتی ءَ رِند ءُ لاشارءِ مِڑ ءَ کُڑ ھتم کُرت۔ پدا میر ءَ سبّی یلا کُرت، سبّی ءِ یلا کنگءِ سبب انگت زانگ نہ بَنت۔ بلے ایشیءَ پَد آ یک مزنیں لشکرے ءِ گوما پنجابءِ سرا اُرش کنت ءُ 16مئی ءَ مُلتان ءُ زرباری پنجاب ءَ ایردست کنت ءُ اودءَ راج کنت۔
دومی مزنیں سردار کہ بلوچ ءِ دپتر ءَ ھست اِنت آ ھان عبداللّلا ھان انت۔ آ ریاست ءِ کلات ءِ چارمی ھان انت۔ ایشیءَ مکران ءَ بگر داں یک نیمگے کندھار ءُ دومی نیمگ ءَ بندر عباس، ءُ ڈیرا گازی ھان ءِ سرا حکومتی کُرتگ۔
سیمی مزن نامیں مردم ھان نوری نصیر ھان انت کہ آ کلات ءِ چشُمّی ھان بوتگ۔ نوری نصیر ھان ھان عبدالللا ھان ءِ رَند پداں شُتگ۔ ایشیءِ راج چہ 1741ءَ بندات بوتگ، داں 50 سال ءَ شُتگ۔ نصیر ھان ءَ یک مُھکمیں فوجے جوڑ کُرتگ کہ آئی ءِ تھا پنجاہ ھزار سپاھیگ ءُ یک ھزار اُشتر بوتگ۔ گڑا اے وھدءَ دو اسمبلی جوڑ بوتگ۔ یکّے ایوانءِ بالا ءُ دومی ایوانءِ زیریں۔
یک دپترزانتے گوش ایت کہ اے وھداں ھزانگ ءِ تھا 40 ھزار کلدار بوتگ۔
نوری نصیر ھان ءِ وھداں گوں اُوگانستان ءَ مِڑ بندات بیت۔
اوگانستان ءِ سرکماش احمد شاہ ابدالی نصیر ھان ءَ لاچار ءُ بےوس کنت کہ آ احمدشاہ ابدالی ءِ سرکماشی ءَ بِمنّیت۔ گُڑا نصیر ھان لاچار بیت ءُ احمد شاہ ابدالی ءِ سرکماشیءَ منّیت۔ ءُ داں دوازدہ سال ءَ بلوچستان ءِ گوریچانی دمگ ءَ پشتون وتئ لیک اَنت۔ پدا ھمے دوزادئیں سالانی تھا احمد شاہ ابدالی بلوچستان ءِ گوریچانی دمگاں ھان نصیر ھاں ءَ واتر کنت۔ چہ اے مِڑ ءُ انگریزانی ایردستی ءَ پیش بلوچستان یک آجوئیں استانے بوتگ۔
انگریزاں چِل سالاں بلوچانی گوما جنگ کُرتگ بلے ھان ءِ مَرگ ءَ چہ پَد انگریز وتئ لوٹاں سوب مند بنت ءُ بلوچستان ءَ ایردست کن اَنت۔ ءُ 1876ءِ وھداں بلوچ ریاست ءَ را ھَپت جاہ ءَ بھر کنگ بیت۔
1: ایرانی بلوچستان
2: اُگانی بلوچستان
3: برٹش بلوچستان
4: کلات
5:مکران
6: ھاران ءُ
7: لسبیلہ۔
سِمّی بَھر
بلوچ قوم پرستی ءِ زاھری
ایران ءِ پھلوی ھاندان وتئ لشکر ءِ زور ءَ بازیں وانندگ، زانتکار ءُ راجدوستیں بلوچے کُشّ ایت ءُ دور دَنت۔ ایران ءِ سرکار گوں بلوچ سرداراں جَنگ کَنت ءُ بلوچ سرداراں شکست دَنت۔ ءُ پدا سرکار بلوچ سرداراں لب ءُ لالچ دَنت ءُ وشّان کَنت۔
بریٹش ءَ پیسر، روادراتکی بلوچستانءَ اوگانستاءِ سیمسراں روگءِ جُھد نہ کُتگ اَت۔
ہندوستانءَ در آئگ ءَ چَہ پد بریٹشءِ چمّ گوں روبرکتی بلوچستانءِ بلوچاں بَنت کہ آیاں وڑے نہ وڑے ءَ چہ زانت ءُ زانشت ءَ دور بدار ایت۔ ءُ بلوچ سرداراں نزور بکنت ءُ لس مھلوک ءَ وتئ نیمگ ءَ بْیار ایت بلے چوش نہ بوت۔ سرداراں بگر داں لس مھلوک ءَ بْیا کس رد نہ کپت۔
چارمی بَھر
مجس ارباب ثلاثہ گوں ملاقاتیں
نبشتہ کار اے بَھر ءَ نبشتہ کنت کہ بلوچ راجی جُنزءِ بِندات لھتیں سرداراں کُتگ کہ اشانی تھا سردار عطا اللہ، غوث بکش ءُ بابا نواب ھیر بکش مری ءِ نام گون اَنت۔
1: نواب ھیر بکش مری
اگاں بابا مَری ءِ زندءُ کِرد ءَ بچار ایں گُڑا مارا اے گندگءَ کئیت کہ بلوچ آجوئی گَلانی تھا باباءِ یکّ مزنیں کِردے بوتگ۔
باباءِ پیرُکءِ نام ھم واجہ ھیر بکش بوتگ۔ واجہ ءَ پہ بلوچ زمین ءِ وتواجھی ءَ گوں بریٹش ءَ جَنگ کُتگ۔ واجہ ھیربکش مَری ءِ پیرُکءِ پِت، میراللہ ھان ءَ ھم اے بابت ءَ مزنیں کِردے پیلو کُتگ۔
بابا مری کسان بیت کہ آئیءِ پِت اے کوڈئیں دگنیا ءَ یل کَنت۔ آئیءِ پِتءِ مَرگءَ چہ پد آ سرکماش کنگ بیت ءُ آ وتئ کسانی ءَ جنگ ءِ میدان ءَ دور کنت، جنگ کنت ءُ باج ھم بارت۔
آ وھداں کہ بابا سرکماش بیت گُڑا آئیءِ لوٹوک باز بَنت ءُ آئی ءَ چہ بازیں گَلانی نیمگءَ داوت دیگ بیت گُڑا بابا نیشنل عوامی پاٹیءَ بھر زور ایت بلے کدی ھم ھکومتی نہ کنت۔
ضیاءِ وھداں وھدے کہ نیشنل عوامی پارٹی ءَ پابندی جنگ بیت گڑا آئی ءَ چہ پَد بابا دگہ ھچّ گَلءِ بَھر نه بیت۔ بلوچ نودربرانی گَل BSO ءَ گوں بیت گوں۔ ضیاہ ءِ وھدءَ ایشانی سرا ھم پابندی لگّ ایت۔ بابا مری وتی تیوگیں زند ءَ پہ بلوچ قومءِ واستہ کُربان کنت۔ بابا
پاکستان ءِ تھا پابندی ءَ پَد بابا اوگانستانءَ ءُ پدا ڈنّا روت۔
بابا ءِ گوشگ بوتگ کہ بلوچءِ بْرات بس بلوچ بوت کنت دگہ کس بوت نہ کنت۔ اگاں ما وت ماں وت یکمُشت ءُ تپاک مہ بئیں گُڑا دگہ کس پہ ما نہ بیت۔
2: غوث بکش بزنجو
میر غوث بکش بزنجو یک مزنیں بلوچ سیاستدانےءِ نام ءَ زانگ بیت۔ غوث بکش ءُ عطا اللہ مینگل سکّیں نزّیکیں سنگت بوتگ اَنت۔
پتءِ مرگءَ پد غوث بخش بزنجو سَکّ کساں بیت گُڑا اے وھدا ایشیءِ ناکوءِ چُک بزنجوانی سرکماش کنگ بیت۔ پدا دیمتر ءَ غوث بکش بزنجوانی سرکماش بیت۔
بلوچ سیاستدانی لَڑ ءَ غوث بکش بزنجو ھما نام انت کہ نواب اکبر بگٹی چہ رند دومی مستریں وانندگ ءُ سرپدیں سْیاستدان انت۔ آئی ءَ وتئی وانگ چہ علی گڑھ مزن شادربرجاہ ءَ دربُرتگ۔ یک وھدے بلوچستان ءِ گورنر ھم بوتگ۔ آ پاکستان ءِ سرکماش زلفقارعلی بھٹو ءِ ھم مزنیں سنگتے بوتگ۔ مزنیں مردم گوش اَنت کہ غوث بکش بزنجو بےنظیر بھٹو ءِ گواه ءِ پت ھم بوتگ۔ وھدے کہ بزنجو شادربرجاہ ءَ وانگ ءَ بیت گڑا بزنجو کانگریس پارٹی ءَ بَھر زوریت۔ بزنجو وھدے کہ بلوچستان ءَ واتر کئیت گڑا اے وھداں بلوچ راجدوستی ءِ ھم مزنیں جوش ءُ جزا یے بیت ۓ۔ 1935 بگر داں 1939ءَ بزنجو سندھ بلوچستان کمیونسٹ پارٹی ءِ سیکریٹری بیت۔ وھدے کہ اے پارٹی پاکستان ءِ حمایت ءَ کنت گُڑا آ اے پارٹی ءَ یلا کنت۔ وھدے کہ برطانوی ءِ نوآبادیات وتئی گُڈّی سیمسراں سَر بیت گڑا بزنجو ءُ دگہ لھتیں راجدوست قلات نیشنل پارٹی ءِ بُنھشت ءَ ایر کن اَنت۔ اے پارٹی ءِ مول ءُ مراد آزاد بلوچستان بیت۔ وھدے کہ پاکستان جوڑ بیت گڑا آ نیشنل عوامی پارٹی ءِ تھا بر زوریت۔ پدا ضیاہ ءِ وھداں کہ اے گَل ءِبسر ءَ پابندی لگّیت، گُڑا پدا رندا دگہ بازیں گَلانیبھر جوڑ بیت۔ گُڈسر ءَ آ وتئی گَلے جوڑ کنت نیشنل پارٹیءِ نامءَ کہ آ انگت ھست اِنت۔
3: سردار عطا اللہ مینگل
بلوچ سیاست ءَ سردار عطا اللہ مینگل یک مزنیں نامے۔ مینگل قبائلءِ سردار عطا اللہ یک مزن نامیں سردارے بوتگ۔ چوشکہ غوث بکش وانندگ بوتگ، آ پیم سردار عطااللہ نہ بوتگ بلے چہ اے گپّءَ کس چمّاں بست نہ کَنت کہ عطااللہ یک سرپدیں ءُ زانتکاریں سردارے بوتگ۔
سردارءِ رسول بکش بوتگ۔ آ ھم یک نامے ءِ ھُدا بُند بوتگ بلے سیاسی مردمے نہ بوتگ۔ آ گیشتر وتئی ملک ءُ مالانی سرا بوتگ۔
رسول بکش وھدے کہ وتئی بچّ عطا اللہ ءَ پہ وانگ ءَ کراچی ءَ اسلامی کالج ءَ دیم دَنت گُڑا سردار عطا اللہ چہ ھمود ءَ گوں سیاست ءَ آژنا بیت ءُ پہ سْیاست ھُبّ ءُ واھگ پیداگ بیت۔ ایوب ھان ءِ وھداں بلوچستان صوبہ یئ نہ بوتگ بلے بلوچ ءَ قومی اسمبلیءِ الیکش ءَ بھر زُرت کُرتگ۔ گڑا سردار یک آزاد امیدوارے بستار ءَ گیچنکاریءَ اوشت ایت ءُ سوبمَنْد بیت۔ 1970sءَ بھٹو ءِ حکومتی بیت گڑا سردار جنگءِ جارءَ جَنت۔ ھمے زمانگءَ آ پدا یاگی بیت ءُ کوہءَ رت۔ پدا جیل بیت ءُ دیر نہ گوز ایت کہ وشّاں بیت ءُ بلوچستان ءِ سرکماش بیت۔ رندا وتئی یک گَلے جوڑ کنت بلوچستان نیشنل پارٹیءِ نامءَ کہ آ انگت ھست اِنت۔ ءُ آئی ءِ سرکماش سردار ءِ چُک سردار اختر مینگل انت۔
پنچمی بَھر
پاکستان ءَ بلوچ راجدوستی ءِ جُنز
اگاں بلوچ راجدوستی جُنز جُھلانکی ءَ چارگ بہ بیت داں گِندگ ھمے کئیت کہ بلوچ راج ءَ زُلم ءُ زوراکینءِ ھِلاپ ءَ مُدام گَھگیری کُتگ۔ بِلّے کہ بلوچ ءِ آبادی کَم بوتگ بلے آئی ءَ مُدام جَنگ داتگ ءُ پُشت ءَ نہ کِنزیتگ۔
بلوچ سرمچار ھم ھمے گہّءَ کن اَنت کہ اگاں مۓ دست ءَ نوکیں تُپنگ ءُ سِلاہ بوتیں گُڑا ما وتئ دژمن دیری ولگوج کُتگ اَت بلے چوشکہ کس مۓ کُمک ءَ تیار نہ اِنت ءُ دژمنءِ گور ءَ نوک نوکیں تپنگ ءُ سِلاہ ھست پمشکہ ما آئیءِ گلّینگ ءَ انگت سوبین نہ بوتگ ایں۔
دیمتر ءَ نبشتہ کار لھتیں گَلانی بابتءَ گپّ کنت کہ 1980 ءِ زمانگ ءَ ھست بوتگ اَنت۔
1: بلوچ عوامی ماز ءِ آزادی
اے ھما گَل بوتگ کہ گوشتگ ۓ گوں دژمن ءَ جنگ الّمی اِنت۔ آ تُری پاکستان بہ بیت یا کہ ایران۔
1963ءَ اے گَل واجہ شیر محمد مری ءَ جوڑ کُرتگ ءُ پدا 1976ءَ میر ھزار ھان ایشیءِ سرکماش بوتگ۔ واجه شیر محمد مری ءَ گوشتگ کہ اگاں وھدے کُلّیں بلوچ گوں دژمن ءَ جنگءَ ساڑی بِہ بَنت گڑا ما دژمن ءَ شریں وڑے ءَ جَت ءُ درکُت کنیں۔
1969ءَ ھمے گَلءِ نام لندن ءَ سر بیت گڑا لندن ءَ یک چِیریں گَلے جوڑ کنگ بیت۔ آئیءِ کُل باسک 17 کس بَنت۔
بلوچ عوامی ماز ءِ آزادی جُنز ھما وھدءَ باز کمزور بیت وھدے امریکا اُوگانستانءِ سرا قبضہ کنت۔
2: دومی گَل BSO بوتگ.
1967ءَ BSO یک گَلے بوتگ بلے پدا اے دو بَھر بوتگ۔ یکّے BSO بوتگ ءُ دومی BSO عوامی بوتگ۔
1980ءَ BSO ءِ باسک 4300 بوتگ انت ءُ BSO عوامی ءِ باسک 2000 بوتگ اَنت۔
مارچ 1978ءَ BSOءِ سرکماش رزاک بگٹی ءُ ھبیب جالب بوتگ اَنت۔ ھبیب جالب ءِ ھیال گیشتر گوں بلوچ عوامی ماز ءَ بندوک بوتگ۔ BSO گَلءِ پروشتطءُ پروش ءِ مستریں سبب ھمے بوتگ کہ لھتیں مردمءَ گوشتگ کہ ماہ سردار غوث بکش بزنجو ءُ سردار عطا اللہ نہ مَنّ ایں پرچا کہ اے دوئیں سردار گوں سرکار ءَ گوں بوتگ اَنت ءُ بابا ھیر بکش مریءِ ھلاپ بوتگ انت۔ گڑا ہمدا چہ BSO پُروشت ءُ پروشءِ آماچ بوتگ۔ سردارانی ھِلاپ ءِ مَردم BSO ءَ رونت ءُ آ کہ سردارانی منّوک بَنت آ BSO عوامی ءَ رونت۔
3: سیمی گَل پاکستان نشنلسٹ پارٹی بوتگ۔
اے گَل چہ NAP ءِ پابندی ءَ رند جوڑ کنگ بیت۔ NAPءِ تھا گیشتر مظلومیں قوم بَنت چوشکہ پشتونءُ بلوچ۔ ایشیءِ مستریں واھشت ھمے بوتگ کہ ما شیک مجیب الرحمن ءَ پاکستان ءِ سرکماش بکن ایں بلے وھدے کہ بنگلادیش آزات بیت گڑا اشانی سرا پابندی لگّیت ءُ اے ھم ھمے پوہ بنت کہ نوں پنجابی مارا ھچ وڑا وار نہ دیئنت۔
شَشمی بَھر: ایران ءِ تھا بلوچ راجی جُنز
ایرانءِ شاہءِ سرکماشی ءِ پرُوش ءَ ءُ گوں عراق ءَ مِڑ ءَ پَد بازیں جُنزاں نَپ کُت۔ چہ آیاں یکّے بلوچءِ جُنز اَت۔ اے وھداں بلوچ ءِ جُنز ءَ ابید دگہ ھم بازیں جُنز بوتگ اَنت کہ آ گوں ایران ءَ جَنگ ءَ بوتگ اَنت ءُ آئیءِ پروشگءِ جُھد ءَ بوتگ اَنت۔ بلے اے وھداں ایران ءَ بلوچ ءِ جُنز آ رنگ ءَ نہ اِنت چوشکہ پاکستان ءَ اِنت۔ ایران ءَ ھمے تُرس بوتگ کہ چو مہ بیت یک روچے بلوچ چَہ ما تِھران ءَ پچ بگر اَنت پمشکہ آیانی چمّ مُدام بلوچاں سکّ بوتگ اَنت۔ ءُ دومی نیمگ ءَ ایران ءِ بلوچ راجدوستانی چم مُدام پاکستانءِ بلوچ راجدوستاں سکّ بوتگ اَنت۔
پهلوی ھاندان ءُ بلوچ
انچوشکہ پاکستان ءِ تھا بلوچ گوش ایت کہ منی دژمن پنجابی اِنت گڑا ھمے پیم ایران ءِ تھا بلوچءِ مستریں دژمن پهلوی ھاندان بوتگ۔ وھدے کہ ایران ءِ تھا پهلوی ھاندان ءِ حکومتی بیت گڑا پھلوی ھاندان ءِ مستریں کار ھمے بیت کہ آ بلوچ قوم پرستاں گٹگیر کنت، بلوچ ھَنداں لشکر کشّی کنت ءُ بلوچ راجدوستانی کماشاں جَنت ءُ کُشیت۔ بلوچ ھَندانی تھا وتئ وانگجاہ جوڑ کَنت ءُ اودا وتئ اُستاداں دیم دَنت دانکہ آؤکیں پدریچ ءِ زانگ شودی ءَ بکنت ءُ آیاں اے باور بکانائین ایت کہ ایران آیانی مُلک اِنت ءُ ھرکس ءَ کہ ایران ءِ نام پہ ھرابی گِپت آ مۓ دژمن اِنت۔
2۔ راجدوستیءِ جُنز ءِ زمین ءِ جَہلا کار کنگ
شاهءِ سرکماشیءِ وھداں ایران ءِ تھا بلوچ آجو لوٹوکیں راجدوستانی سرا پابندی لگّیت گڑا اے لاچار بَنت کہ زمینءِ جَہلا پَنا بزور اَنت۔ وھدے کہ اے زمینءِ جَہلا بنت گُڑا ایشانی گپّ ءُ تران گوں لس مھلوک ءَ کم بیت۔ اے ھمے زمانگ بیت کہ گَل باز نزور ترّیت ءُ تاوانبار بیت۔
ھپتمی بَھر
پاکستان ءَ بلوچ راجدوستی ءُ بلوچ راجدوستانی گوں پاکستان ءَ یکجاھی
اے وَ راستیں ھبرے کہ روس ءَ وتئ چمّ بلوچستانءِ سرا داشتگ اَنت۔ بلے پاکستان ءُ ایران دوئیں مُلکاں کمیونسٹ گَل نیست۔
پاکستانی کمنیونسٹ مؤمنٹ ءِ تھا گیشتر ھندستان ءَ چَہ آتکگیں مردم اَنت۔ آ چوشیں مزنیں قوم ءُ نسلے چَہ سیادی نہ کن اَنت پمیشکہ باز سوبمند نہ انت ءُ ھما کہ پہ بلوچ ءِ کُمکّ ءَ پاد کئیت گُڑا آ بلوچءِ آجوئیءِ پڑءَ ھاموش بیت۔ بلکیں ھما بلوچ کہ گوں سرکار ءَ ھمرا اِنت ھمایاں کُمک کن انت۔
بلوچ راجدوستی ءُ روسءِ شوربندی
اے راستیں ھبرے کہ روس ءَ پاکستانءِ جوڑ کنگ ءَ باز کُمک کُتگ چیا کہ روس ءَ چہ امریکا ءُ انڈیا ءَ ھتر بوتگ۔ پاکستانءِ جُدا بوئگ ءَ پد ھم انڈیا ءِ تھا کمیونسٹ گَل ءَ پاکستان کُمک کُتگ۔ بلے روس نلوٹ ایت کہ بلوچ ءُ اے دگہ راج چہ پاکستان ءَ جُدا بِہ بَنت بلکیں آئی ءِ لوٹ اِنت کہ بلوچ گوں پاکستان ءَ ھور بِہ بَنت۔
روس ءَ بلوچستانءِ جیڑہءِ سرا ھاموشی ءِ یک سببے بلوچستان ءَ کمیونسٹ گَل ءِ بےسوبی اِنت۔ نواب ھیر بکش مری، غوث بکش بزنجو ءُ حُسین ءِ پیمیں مَردم یک برے گوں کمیونسٹ ءَ ھوار بَنت بلے پدا بلوچستان ءِ آجوئی ءِ بابت ءِ جیڑ اَنت۔
پاکستان ءِ تھا کمنیونسیٹ پارٹی ءِ مردم گیشتر پنجابی ءُ مهاجر بوتگ اَنت گڑا ایشاں بلوچ پہ بلوچستانءِ آجوئی ءَ بِھّ کُمک نہ کُتگ۔
ھَشتمی بَھر
اسلام آباد ءُ تِھران ءِ شوربَندی
پاکستان ءُ ایران نند اَنت، شور ءُ تران کن اَنت کہ بلوچستان آجوئی ءَ ھچّ رنگ ءَ نئیلگی اِنت چیا کہ بلوچانی آبادی کسان ءُ زمین پراہ شاھیگان اِنت کہ اودا پُرارزشتیں زمینی مالءُ مڈّی ھست۔
ضیاہ الحق ھمے گوش ایت کہ اگاں ما دستے ماسُرینیں گڑا مُلک چَہ مۓ دست ءَ روت۔ گڑا ھمے شور منّگ بیت کہ پاکستانءِ کجام ھم صوبہ کہ مزن اَنت ایشان بَھر کن ایں ءُ پنچ صوبہ جوڑ کن ایں۔ ضیا ھمے گوش ایت کہ بلوچستان ءَ تھنا بلوچ آباد نہ انت، بلکیں دگہ بازیں راج چوشکہ پشتون، ھم آباد اَنت۔ گُڑا پشتونان دگہ یک صوبہ یے دیگ بِہ بیت۔ بلے ضیا ءِ اے گپّ ءَ کُمک نہ رس ایت۔
بھٹو ءِ کرد ءُ بلوچستان
بھٹو ءُ ضیا راستے کہ جِنّ ءُ اسپنتان بوتگ اَنت بلے بلوچستان ءِ جیڑہ ءِ سرا آیانی ھیال یک بوتگ کہ بلوچ وتواجھی ءَ نئیلگی اَنت۔
نُھمی بَھر
آجوئی ءِ جیڑہ، مشکل ءُ امکانات
اے بَھر ءَ نبشتہ کار ءَ بازیں بُنگپّانی سرا نبشتہ کُتگ چوشکہ:
1: دیمروئی ءِ عمل
دیمروئیءِ اوالی جیڑہ سوئی گیس اِنت۔ 1953ءَ وھدے چہ بلوچستانءِ دمگ ڈیرا بگٹی ءِ ھَند سوئی ءَ گیس دَرکپیت گُڑا ھمے گیس پنجاب ءُ پاکستانءِ اے دگہ صوبہاں بَرگ ءُ سر کنگ بیت۔ 70 سالءِ گوزگ ءَ پَد ھم بلوچستان ءِ زمین ءَ چہ درتکگیں گیس بلوچ ءَ سَر نہ اِنت بلے پنجابءِ ھر لوگ ءَ ھمے گیس سر بوتگ۔ بلوچ انگت پہ نان پچی ءَ دار سوچ اَنت۔
اے ایوک ءَ گیس نہ اِنت کہ لُٹ ءُ پُل بوئگءَ اِنت بلکیں بلئِےچستانءِ زمین چہ چیریں مال ءُ مڈّی ءَ پُر اِنت چوشکہ بولانءِ اِشکر، چاگی ءِ پُرارزشتیں سِنگ ءُ سُھر ءُ تِلا بلے اے درست چہ بلوچءِ دست رس ءَ چہ دور اَنت۔
2: آزادی ءِ ھستانک
پاکستان ءُ ایران ءَ مھلوک ءِ گوش پُر کُتگ اَنت کہ بلوچستانءِ آجوئی نہ بوتگیں ھبرے چیا کہ بلوچانی آبادی سک کمّ اِنت ءُ آیاں پہ کُمک ءَ کس ساڑی نہ اِنت۔
یک رندے بھٹو گوش ایت کہ بلوچستانءِ آبادی کَم اِنت ءُ ما باز پَنڈنگ کنگءَ ایں۔ گُڑا اشیءِ پسّو ءَ عطا اللہ مینگل گوش ایت کہ یکّے وَ شما مارا پہ زور وتئ بھر کُتگ ءُ مۓ مال ءُ مڈّیاں لُٹ ءُ پُل کنگءَ ۓ ءُ دومی نیمگءَ مارا پِنڈوک سرپد بہ ۓ.
بلوچ راجدوست گوش اَنت کہ بلوچستان چہ زمینی مال ءُ گنج ءَ پُر اِنت۔ اگاں ما آجو ءُ وتئ زمینءِ واجہ وت بِہ بئیں گُڑا ما یکّ آسودگیں زندےءِ واھُند بِہ ئیں۔ اے بابت ءَ ھان کلات ءَ ھم گوشتگ کہ بلوچ زھگ کہ ودی بیت آ شُپاد اِنت بلے آ ھرچ گامے کہ ایر کَنت گُڑا آئی پاد سُھرءِ سرا بَنت۔
ایشیءِ ابید بلوچستان ءِ بازیں دمگاں مال ءُ مڑّی است، ءُ بازیں جاہ ءَ سائل است ءُ بلوچ وتی آجوئی ءَ پد گوں شریں وڑے ءَ ایشان کارمرز کنت۔
3: آبادیءِ جیڑہ
بلوچ ءِ آبادی بھر ءُ بانگ انت۔ چوشکہ لھتیں عرب ملکاں نشتگ اَنت ءُ لھتیں دگنیا ءِ دگہ ھَند ءُ دمگاں نشتگ اَنت۔ بلوچ ءِ آبادیءِ بھر ءُ بانگءِ مستریں سبب بلوچستان ءَ روزیگی جاورانی نگیگی اِنت۔ بلوچءِ مزنیں آبادی یے سندھ ءُ پنجاب ءَ اِنت۔ اگاں بلوچستان روزیگی جاورھال جْوان بِہ بَنت گُڑا درائیں بلوچ دوبر واتر وتئ مُلک ءَ کاینت۔ بلوچستانءِ لھتیں ھَند پشتوناں پُشت ءَ کشّیتگ اَنت۔ پشتوناں نہ بلوچ پہ بلوچستانءِ آجوئی ءَ کُمک کُتگ اَنت ءُ نانکہ آ پنجابی ءَ گوں سنگت بوتگ اَنت۔
دھمی بَھر Aبلوچستان ءِ آؤکیں وھد
ماسکو ءُ واشنگٹن
نبشتہ کار کتابءِ اے بھر ءَ گوش ایت کہ روس آیگءِ سبب اوگانستان بوتگ۔ آ ادا دو بُنگپّانی سرا تران کَنت۔ اوّل آ نبشتہ کنت کہ روس ءَ یک رندے وتئ دست پہ بلوچانی کُمک ءَ شھارتگ بلے بلوچاں آئیءِ دست وت نہ گِپتگ ءُ کُمک نہ زُرتگ۔ دومّی آ گوش ایت کہ روس ءِ لوٹ بوتگ کہ وتئ نزیکّ ءُ گور ءِ اسلامی زور ءَ نِزور بکنت۔ امریکا ءِ بابت ءَ نبشتہ کار نبشتہ کَنت کہ امریکا دھشتگردی ءِ نامءِ سرا پاکستان ءَ کُمک کَنت ءُ پاکستان ھمے زرّاں بلوچ آجو لوٹوکیں مَھلوک ءِ سرا کارمَرز کَنت۔ گُڑا روس بگند ۓ پاد بئیت ءُ بلوچ ءَ کُمک بکنت۔ ءُ اے پہ امریکا ءَ دگہ سردردے بِہ بیت۔
ReplyForward |
