ادب و چاگڑد
گوگی واتیانگو نا رِد ئٹ
نوشتہ کار : سلمان بلوچ
گوگی واتیانگو 5 جنوری 1938 نا دے افریقہ نا ملک کینیا ٹی ودی مس، انگریز آک گوگی ءِ پن ئس تسُسر 'جیمز گوگی' ولے گوگی واتیانگو اوفتا تروکا دا پن ءِ رد کیک او پائک کنا افریقی آ پن کنا دود، رسم رواج و کنا راجی آ پجار ءِ درشان کیک ءُ انگریز آتا تروکا پن پین ہچ ئس اف بیرہ کنا راجی آ بسند ءِ مسخ کننگ ءِ۔ گوگی معاشیات و ادب افریقہ ٹی خوانا پدا او انگلستان آن تینا خواننگ ءِ سرجم کرے و ولدا تینا ہند کینیا غا بسک و خوانیفنگ ءِ بنا کرے۔ 1977 نا زمان ئٹ گوگی یونیورسٹی آف نیروبی ٹی ادب نا ڈیپارٹمنٹ نا چیئرمین مس۔
گوگی بھاز آ کتاب آتا نوشتوک ئسے ارافتیٹ ناول, افسانہ و پوسٹ کالونیل ادب نا کتاب ساڑی اریر۔ کینیا نا غلامی نا وخت ئٹ انگریز آتا قوضہ نا برخلاف نوشتہ کننگ و اوفتا قوضہ نا مون ءِ پاش کننگ ئٹ اونا بھلو کڑد اس مسنے۔ غلامی نا زی آ گوگی نا نوشتہ مروکا کتاب آتے ٹی ڈیکالونائزنگ دی مائنڈ ءِ ہراڑٹی قوضہ گیری نا ذہنی زیم آتا رد کننگ کن بولی نا کڑد ءِ درشان کیک، (pen points, Gunpoints and Dreams) دا کتاب ئٹ ادب او سیاست نا زی آ ہیت کیک، داڑان بیدس ہم گوگی نا پین بھاز آ کتاب آک ساڑی اریرک دنکہ Moving the centre, Homecoming, Barrel of a pen.و پین پین۔۔۔۔
ادب و چاگرد و سیاست
تون دافتا سیالی ءِ پہہ مننگ کن اسیکہ نن ادب نا پارہ غا کانہ، ادب ایہن تینا تیہٹی
اسہ بھلّو جہان ئسے ولے اڑزانی ئٹ ادب ءِ پہہ مننگ کن دا پاننگ کہ "ہر ہمو گڑا
ارا نوشتہ نا دروشم ئٹی ءِ ادب پاننگک" رد مفرو، ہندا وڑ مون مستی اگہ نن ادب
نا زی آ نوشتہ کین گڑا ادب تینا تیہٹی اسہ بھلّو زیم ئس تخِک دنکہ گوگی پائک،
"
Littereture is the most suble weapon for controlling people, Because it works through
Influencing emotions, the imagination and counciousness of people.
داڑان مراد ہندادے کہ
گڑاس خواننگ نا مطلب تینا تیہٹی مَٹی و بدلی ہتنگ نا ءِ، ولے نن ہُرن ادب جہان ئٹ امر
بسک۔
گوگی پائک دیہاڑ ئٹ
ادب بندغ آتا شعوری آ عمل آتیان مونا بسک،
'Littereture
results from councious acts of men'
ہندا وڑ اگہ نن تیوی
دروشم ئٹ ہُرن گڑا اسہ چاگڑد ئسے ٹی ادب ہمو پروڈکٹ ءِ ہرا بندغ آتا جیڑنگ، پہہ مننگ
و عمل کننگ نا لائخی تیتون تفوک ءِ، ہرا چاگڑد نا عکس آک، جنگ و جیڑہ یا تضاد آک کہ
لوز آتا دروشم ئٹ مونا بسُرک ، ہمودے پین خُوڑتی
ئٹ ہُرن گڑا چاگڑد نا ہمو خواست آتیان مونا بسک کہ ہراڑٹی او اسہ حالیت ئسے آن ایلو
وڑ مننگ خواہک
'Being And process of Becoming'۔
گوگی پاہک ادب چاگڑد
ئٹ بندغ آتا اسہ مون پاشی ئسے ہرا بندغ آتیتون ابرم آن مسنے، مطلب تینا بنداوی آ خواست
آتا پورو کننگ کن۔ مثیل دنکہ کُننگ کن نکان ئٹ بدل سدل ہتنگ، بیننگ کن نقش و نگار آتا
بدل سدل یا رہینگ کن اُرا ماڑی تے ئٹ بدل سدل ہتنگ، و ہندن اسہ وڑ آن ایلو وڑ مننگ
نا خواست ارادے گوگی پائک۔
'Creating And
recreating Itself in History'
ولے اسہ وڑ آن ایلو
وڑ مننگ یا چاگڑد نا مون پاشی آن بیدس ادب داکان ہم گیشتر ارزشت تخک، او داوڑ کہ ادب
بندغ ءِ تیوہ غا مٹ کننگ کیک، بندغ نا زند تیر کننگ نا دود، اونا ہردے نا جہد کہ ارا
ابرم تون، چاگڑد تون یا تینا جند ئتون مریک غُٹ ءِ دروشم تننگ کیک۔
مون مستی نن ہُرن ادب چاگڑد نا تیوی بھلّا جیڑہ غا تیتون تفوک ءِ ہرا معاشی رد آ، سیاسی رد آ ، طبقاتی رد آ ہراڑے اسہ بڑز ئنا تپہ (ڈومینینٹ کلاس) و ایلو شیف ئنا تپہ (ریسیسو کلاس) ساڑی مریرہ یا نسلی رد آ اریرک، و دا ادب نا خصوصیت آک پاننگرہ، ہرا نا سوب آن ادب تینا تیہٹی اسہ تقسیم ئس جوڑ مسُنے۔ چاگرد نا ہمو بُڑز ئنا تپہ ہرا (ڈومینینٹ کلاس) پاننگک ادب اوفتا کنڈ آ مریک، مطلب اوفتا دوٹی مریکک، داسہ ہندا تپہ ادب ءِ اسہ سِلہہ ئسے نا وڑئٹ کاریم ئٹ ہتیک و تیوہ غا چاگڑد ءِ تینا سواد نا وڑئٹ مٹ کیک۔ چاگرد نا تیہٹی بندغ آتا سوچ، فکر، خیال یا بندغ آتا زند ءِ تیر کننگ نا دود اسکان غُٹ ءِ تینا وڑ ئٹ مٹ کننگ کیک۔ داڑکن او تعلیمی نظام، کمیونیکیشن نا نظام آن الیس خبر و ایلو غُٹ آ زریعہ غاتے کاریم ئٹ ہتیک۔
ارٹمی بشخ چاگڑد ءِ،
چاگڑد ئسے نا جوڑ مننگ ءِ ہیگل نا تروکا خیال نا رد ئٹ ارا Hegelian civil
society
پاننگک جہان ئٹ اولی
چاگڑد کہ جوڑ مس اونا جوڑ مننگ نا سوب لین دین ئس، داسہ ہندا چاگڑد ءِ برجا توننگ کن
اسہ ٹولی ئسے نا بکار مس ارا دا لین دین نا نظام ءِ برجا تورے و ہندن چاگڑد ہم پنّپ
و برجا سلے، جوڑ مروکا ٹولی ردوم ہلنگ نا عمل آن گدرینگسہ تینا تیہٹی بدلی اتیسہ کرے،
او تعلیمی نظام ئس ایسُر، حال حوال آتا سر کننگ کن کمیونیکیشن نا نظام ئس ایسُر و چاگڑد ءِ رکھنگ کن قانود ہم ایسُر۔ دا گڑا تا
بننگ آن پد چاگڑد ہرا ردوم نا کہ بھلا پند ءِ خلکُسس دافتا زی آ عملک چاگڑد ئٹ جاگہ
کریسر و چاگڑد نا نارمز اینڈ ویلیوز جوڑ مسُسر، ہندا نارمز اینڈ ویلیوز آتے نن دود
و ربیدہ نا پن ءِ تسُن۔ ہندا دود و ربیدہ تینا تہٹی اِرا بشخ ءِ اسٹ (مٹیرئیل کلچر) ءِ ہراڑٹی
چاگڑد ئسے نا نقش و نگاراک ،پُچ و پوشاک و بود و بیرشت آک بریرہ ، ایلو (ابسٹریکٹ کلچر)
ءِ ہراڑٹی چاگڑد ئسے نا قانودی اصول آک، بولی و ادب بریرہ، گوگی مثیل ئس ایتک و پائک،
چاگڑد پُھل ئسے نا درخت ئسے، پُھل او چاگڑد نا دود و ربیدہ ءِ، داسہ ہندا پُھل ئنا
زیبائی چاگرد نا (مٹیرئیل کچر) ءِ و پُھل نا تیہٹی ارا کہ بِج ءِ او چاگڑد نا (ابسٹریکٹ
کلچر) ءِ ارا بروکا زنک ءِ چاگڑد نا باروئٹ سوج ایتک۔ داکان ادب و چاگڑد نا سیالی ءِ
نن سرپند مرینہ، ردوم نا ہندا عمل کہ ہراڑٹی چاگڑد تینے دود و ربیدہ نا دروشم ئٹ منّیفے
و ہندا چاگڑد ئٹ ادب چاگڑد نا خاص انگا پروڈکٹ ءِ یا نن پان چاگڑد ئسے نا پجار و ہست
ادب تون تفنگا۔
داسہ اگہ خیال کننگے
گڑا ملی ٹی بریک، کالونیئلزم و امپیریلزم نا دور ئٹ غُٹ آن مست قوضہ گیر اس انتے چاگرد
نا ادب ءِ مٹ کننگ نا کوشست ءِ کریکہ انتے کہ او تیوہ غا چاگڑد ءِ تینا وڑئٹ مٹ کننگ
خوائسُرہ۔
ولے دا گڑا ءِ او امر
کریر؟
ہیگل نا تروکا تیوری
نا رد ئٹ ہرا ٹولی نا گپ ءِ کرین اینو ہمو ٹولی ءِ نن اسہ چاگرد ئسے نا پولیٹیکل سٹرکچر
نا پن آن چانہ، ہندا ٹولی کہ دانا کاریم چاگڑد ءِ چلیفنگ نا اسک، وخت تدینگسہ تیوہ
غا چاگرد ہندا ٹولی نا دوٹی بسک و چاگڑد ئٹ بروکا بدل سدل آک ہم ہندافتا دوٹی بسر۔
ہیگل نا خڑکا سوج ئس
مریک، او دن کہ ردوم نا تیہٹی چاگڑد ئٹ بدلی امر بسک؟
دا نا ورندی ئٹ ہیگل پائک چاگڑد نا بنداو ہرا معاش نا زی آ تخنگانے و پولیٹیکل اسٹرکچر نا دُو ٹی ہندا معاشی نظام نا مننگ نا سوب آن ہرا وخت دا ٹولی معاشی نظام ئٹ مٹی بدل سدل ایسُنے (Change in Mode Of Production) دانا سوب آن تیوہ غا چاگڑد ئٹ مٹی بسُنے۔ مثیل ئس کُننگ، بیننگ یا رہینگ کن نکان، نقش و نگار ،اُرا ماڑی یا جہان جدیدیت نا نیمہ غا ہِننگ ءُ دافتیٹی مٹی ہتنگ نا سوب آن دافتا زیم چاگڑد نا نارمز اینڈ ویلیوز آتیا تمّا اَرا نا سوب آن چاگڑد نا دود و ربیدہ غ تیٹی ہم مٹی بسک۔ ہندا سوب آن ہیگل پائک چاگڑد تینا تیہٹی اسہ کمپلیکسٹی ئسے، اسہ گڑاسے ٹی بدل سدل کننگ چاگڑد نا ایلو گڑا تے آ زیم شاغک و اوفک ہم بدل مریرہ۔ داکان نن پہہ مرون کہ چاگڑد ئٹ پولیٹیکل اسٹرکچر نا ہتوکا مٹی و بدلیک تیوہ غا چاگڑد ءِ بدل کننگ کیرہ، دا ٹولی چاگرد ئٹ ہرکس نا دوٹی مس تیوہ غا چاگڑد ہمونا دوٹی مرو۔ تینا دوٹی مسک چاگڑد آجو پاننگو، پین ئسے نا دوٹی مس چاگڑد غلام پاننگو۔
