کتاب: میر عبدالعزیز کرد
نوشت: شاہ محمد مری
چمشانک: اختر بلوچ
اینو کہ نن دم النگ ان، اوڑکن بھاز آ پاک آ بندغ آتا ارمان و دو تا سوگوی ءِ۔ ہمو گچینا بندغ آک گچین جوڑ مننگ تون اوار سائنسی، ادبی و ہر وڑ ئنا فکر آتا بیرک و فکر ءِ تسر۔ او ننے اندُنو نظر اس تسر ہراٹی کل سخت بندغی فکر ئنا ویل آتے اُریر۔
منہ اندُنو بندغ ئسر ہرا عقل و شعور کِن ہر وڑ ئنا کوشست کریر، اوفتا نسل و علاقہ، زبان و مذہب پین ئس ولے اوفتا مسخت بندغ آتون مابت کننگ و اُوفتا خیر ئنا سرسہبی کن کوشست کننگ ئس، ننا علاقہ غاتے ٹی اندنو دلیر ءُ بندغ گدرینگانو ہرا ہر ڈکھ و ویل آتون مون تریسہ کرینو۔
اندنو دلیر ءُ بندغ اس میر عبدالعزیز کُرد نا دروشم ئٹ ننا ڈغار بلوچستان ہم ودی کرینے، کرد صاحب بلوچ شاری ڈول ئنا سیاست نا بنماس ءِ تخوک آ سروک پاننگک، اُو پمفلٹ، اخبار، پوسٹر و ہڑتال نا دروشم ئٹ تینا سیاست ءِ برجا تخا ارا بلوچ چاگڑد کِن اسہ پوسکنو سیاسی ءُ رنگ اس ئس۔
اُلسی جہدکار میر عبدالعزیز کرد 1907 ئٹ مستونگ ٹی ودی مس، اونا باوہ ٹلنڑ خان ریاست قلات ئٹ ملازم ئس، چُنکا سن ئٹ او تینا لمّہ و باوہ نا سیخا آن پدماندہ مس۔ ہموتم او تینا خواننگ ءِ مڈل آن پد برجاء تخِنگ کتو ولے او تینا خواننگ ءِ پدی الیتو او تینا سرخُوت تینٹ تینا خواننگ ءِ برجاء تخا۔
کرد صاحب 1920 ئٹ "ینگ بلوچ" نا پِن ئٹ گَل اس جوڑ کرے، ہرا کہ بلوچستان نا اولیکو سیاسی گَل ئس، ہرا نا پن ولدا "ینگ بلوچ" آن "انجمن اتحاد بلوچاں" ٹی مٹ مس، ہرا نا مسخت انگریز حکومت آن الس کِن بنداوی جمہوری و بندغی حق آتا خواندار ئس۔ 1920 ئٹ اودے تینا مسخت نا سرسہبی کن اسہ بھلو کمک و کوپہ اس یوسف عزیز مگسی نا دروشم ئٹ رسینگا۔ کرد صاحب تینا سیاسی جہد و فکر ءِ جتاء جتاء انگا رسالہ و اخبار آتے ٹی مضمون نوشت نا کمک ئٹ تالان کرے، کرد صاحب تینا سیاسی نوشت اس ہڑدے ئی "آزاد" آن شینک کرے ہراٹی او الس نا گچین کروک کوالخواہ تا اسمبلی جوڑ کننگ و بلوچستان نا بھاز آ علاقہ غاتے ہرا بشخ ئنا گواچی مسوسر ہمو علاقہ غاتے ریاست ءِ قلات ئٹ پدا اوار کننگ نا سَلاہ ءِ مونا ہیس۔
9ستمبر 1932ء ئٹ او جتاء بلوچستان نا نظریہ ءِ تالان کرے، دسمبر 1932 ٹی جیکب آباد ئٹ "بلوچستان اینڈ آل انڈیا بلوچ کانفرنس" اڈ تننگا ہراٹی وڑ وڑ ئنا سرحال آتیا گپ و تران مس۔ 1933 ئٹ ہندوستان نا بھاز آ سیاسی بندغ آتون اوڑدہی کرے و اوفتون سیاسی گپ و اوفتے بلوچستان نا الس نا ویل آتیان واخب کرے۔
کرد صاحب نا رد ئٹ بلوچستان نا درستی راستی دا وڑ ءِ:
بلوچستان نا ڈغار ایران، افغانستان، برٹش بلوچستان، ریاست قلات، مری و بگٹی قبائلی علاقہ، ڈیرہ غازی خان، تالپور(خیرپور) ئٹ بشخوک ءِ ہرافتے ٹی جتاء انگا راج آک جاگہی ءُ۔ کرد صاحب تینا نوشت آتے ٹی برٹش بلوچستان نا نظام حکومت ئٹ نظام عدالت، مالی آمدنی، فوج، پولیس، سیاسی بست و بند، تعلیمی و کشت و کشاری وڑ و ڈول آتے تالان و اوفتیا نغدکاری کرینے۔
1934 ئٹ کرد صاحب تاغت آتا برخلاف نوشتہ کننگ نا سوب آن مچھ ئنا جیل ئٹ 3 سال قیذ مس۔ اونا آجو مننگ آن گُڈ "انجمن اتحاد بلوچاں" نا وجود ایسر مننگ ئس گڑا اودے اسہ پوسکنو پارٹی اس جوڑ کننگ نا گرج مس۔
5 فروری1937ء ٹی "قلات سٹیٹ نیشنل پارٹی" نا بناء ءِ کرے، کرد صاحب پارٹی نا صدر، میر گل خان نصیر نائب صدر و ملک فیض محمد یوسفزئی جنرل سیکریٹری گچین مسر۔
پارٹی نا 2 (اہم نکات) ئسر:
1_کوزہ گیر ءِ داکان کشنگ۔
2_ سرداری نظام نا ایسری۔
دِتر نا برابری، سردار آتا الس آن الوکا ٹیکس آتے چٹفنگ، اقلیت آتا بنداوی حق آتا خواست، دا کوشست آک پارٹی نا جہد ئنا بشخ ئسر۔ 1942 آن 1948ء اسکان کرد صاحب بیدس پارٹی و اوغدہ غان تینا الس نا خذمت ءِ کریسہ کرے۔
1958 ئٹ فوجی حکومت (مارشل لاء) ئٹ تینا ہمسر و سنگت آتے تون اوار دزگیر مس۔ اندن 1959 آن 1963ء اسکان کرد صاحب اسہ وار ولدا مچھ ئنا جیل ئٹ دے تے تیر کرے، 1965ء ٹی کرد صاحب تینا خاہوت نا منہ بندغ آتے تون اوار ولدا دزگیر مس، داخس وار اونا دزگیر مننگ نا سوب بیرہ اندا ئس کہ او ظلم و ظالم تا برخلاف تینا توار ءِ بڑز کرے۔
15 اپریل 1969 ئٹ بلوچ سیاست نا چراغ و سروک 65 سال نا سن ئٹ دا جہان آن موکل کرے، کرد صاحب نا گڈیکو جاہ عزیز آباد مستونگ ئٹی ءِ۔
