بلوچستان نا سیاسی دود او ربیدگ ءُ اونا قبائلی نظام
اولی بشخ
پروفیسر عزیز محمد بگٹی | شمس بلوچ
دا کتاب ءِ بلوچستان نا پنی آ نوشتکار عزیز محمد بگٹی نوشتہ کرینے ہرا ٹی اود بلوچستان نا بابت ئٹ نوشتہ کرینے کہ اگہ نن بلوچستان نا دیہاڑ ءِ خوانن گڑا نن دا خنینہ کہ بلوچستان ہر دور باری و ہر حکومت نا شیف آ مسونے۔
بلوچستان انگریز حکومت آن ہلیس کہ پاکستان نا جوڑ مننگ آن پد ہم ہر وخت ظلم، زوراکی و نا انصافی خنیسہ کرینے اگہ نن تاریخ نا پنہ غاتے خوڑتی ئٹ ہرین خوانن گڑا نن خنینہ کہ بلوچاک اولی دے آن ہلیس کہ اینو دے ہسکان مزاحمت ءِ برجاء تخانو دا ہیت ئنا منوگر آک بیرہ بلوچستان نا آخہ بلکن بلوچستان نا پیشن نا مورخ آک ہم منوگر اریر و اوفک دا کسہ غاتے تینا کتاب آتے ٹی ہم نوشت کرینو۔ برصغیر نا آجوئی آن پد ہم مسلمان ملک آتا اولی ٹک بلوچستان مسونے ہرا ٹی فوجی آپریشن آتیان ہلیس اخلاقی و نفسیاتی وڑٹ مدام بلوچستان نا زی آ ظلم برجاء مسونے ولے بلوچستان نا گیشتر مخلوق نا رد عمل سیاسی و سلاء بند جہد مسونے۔
بلوچستان تاریخ نا چنکو سفر ئس:
دا کتاب ٹی نوشتکار مستی نوشتہ کیک کہ بلوچستان پاکستان نا کل آن بھلا صوبہ ءِ ہرا تینا زیبائی ٹی یکتا ءِ ہموڑے بلوچستان ٹی قدرت نا کنڈان تروک بے بہا غا نہادی آ گڑاک ہریر ہرا بلوچستان ءِ امیر ءُ ریاست ئس جوڑنگ کیرہ ولے بد بختی دادے کہ ہندا مڈی تا بہانہ غان مدام بلوچستان آ پیشن نا نظر مسونے و دا بلوچ آتے کن اسہ بھلو ڈکھ و ویل ئس جوڑ مسونے بلوچستان ایہن تو باز بھلن ءِ ولے انگریز آتا چم آتا سوب آن بلوچ سڑدار آتے تین پہ تین جنگ ترسہ ایسر بلوچستان ءِ چار بشخ کریر۔ ہراڑان گولڈ سمڈ لائن نا کمک ئٹ اسہ بشخ ئس ایران نا قوضہ ٹی ہنا و قطب اٹی ڈیورنڈ لائن نا کمک ئٹ اسہ بشخ ئس اوغانستان ءِ رسینگا اوکان گڈ برطانوی ہند ہراڑے بلوچ آک زیات ئسر اوفتے دروغ و چم نا وڑ ئٹ "برٹش بلوچستان و آزاد ریاست قلات" نا پنا بشخ کننگا۔
دا کتاب ٹی پاکستان نا بشخ ئٹی بروک بلوچستان نا باروٹ جاچ ہلنگانے ہرا تیوہ ملک نا غٹ آن بھلا صوبہ ءِ و ہرا نا کل رقبہ اسہ لکھ سی و چار ہزار مربع میل ءِ و پاکستان ءِ اگہ گڑاس اہمیت ارے گڑا او بلوچستان نا سوب آن ءِ انتئے کہ بلوچستان ٹی ڈھکوک مڈیک باز زیات ءُ۔
کتاب ٹی مون مستی نوشتکار نوشتہ کیک کہ 1962 ٹی ہراتم ہیری کیسنجر تینا پاکستان نا اسہ دورہ سے ٹی اسہ اخبار والو سے ورندی ترسہ پاہک کہ " انت ئس کہ مرے ای بلوچستان نا ویل ئنا وجود ءِ منپرہ"
بلوچستان نا اہمیت نا گمان وخت ئسے آن امریکہ و ایلو ملک آتے مسونے۔ ہندن مستی نوشتہ کیک کہ بلوچستان نا ہندن اہمیت ہم بلوچ آتے کن اسہ بھلو بد بختی ئس جوڑ مسونے اسلام آباد و بلوچ نا نیام ئٹ کل خرّی و مری تا گواچن ہم ہندادے۔
ہندن مستی نوشتکار دا کتاب ئٹی انگریز پولکار سیلیگ ہیرسن نا کتاب in Afghan shadow نا ہیت ءِ اتیک کہ "(اگہ پشتون آتا ہم پنجاب نا بھلا مننگ نا برخلاف جوزہ ارے ولے اوفک پاکستان آن بے تعلقداری یا یکہ ءُ ریاست ئسے نا جوان وڑ ئٹ منوگر افس ارا وڑ کہ بلوچ آتا ارے)
پشتون آک گڑاس ہلنگ تننگ نا کمک ئٹ ہیت ئکن تیار ءُ ولے بلوچ آتا مسخت و مزل جتاء ءِ او تینا راجی پجار، ننگ و شرف کن جوان وڑ ئٹ تینا آجوئی کن است خواہی تخرہ و پاکستان مدام چم بازی ئٹ پشتون تون گنڈوک مسونے کہ او بلوچ آتا طاغت ءِ چٹفے۔"
ہندن مستی بلوچاک نہ بیرہ بلوچستان بلکن سندھ و پنجاب ئٹ ہم تولوک ءُ اگہ نن ہرین تو سندھ ئٹ ننے تالپور آتا و پنجاپ ئٹ سکھ آتے مڑفیسہ مزاری تا جہد ہم اسہ بھلو مزاحمتی تحریک ئس نظر بریک۔ ہندا وڈ مستی بلوچ آتا ڈس فردوسی نا شاہنامہ 1010ء ٹی ہم بادشاہ کاوس ہرادے( کیسخرو ) ہم پارہ ہرا نا فوج ٹی بلوچ آتا حوال بہادر و لائخی ئٹ ننے نظر بریک۔
بلوچ آتا تینا شاعری نا حساب ئٹ ننے ہندن گمان مریک کہ بلوچاک 44 چل و چار قبائل ئٹ گنڈوک مسونو ولے اوفتا اِرا بھلو گروپ مسونو ہرا رند و لاشاری نا پنا تاریخ ٹی نزر بریرہ اندن مکران آن پیشتمیسہ لاشاریک درہ مولہ نا کسر آن کچھی ءِ سر مسر و ہموڈے رہینگار ۔ رند آک قلات آن ہنیسہ درہ بولان نا کسر ئٹ سنی شوارن و سیوی ٹی آباد مسر۔ بلوچاک دا علاقہ آتے ٹی اے وخت بادشاہ ئسر و سیوی اوفتا سیاسی آ مرک ئس۔اگہ نن مونا ہرین لاشاری تا بشخ ئٹی باز آ جاگہ غاک بسوسر و رند آتا ونڈ ئٹی کم علاقہ بسر ہمپ و لڈ نا و جان ئنا گپ مستی ودیسہ کرے و ہڑتوما قبائل آتے ٹی مُری ایسک ہرا مونی ہنسا ترندی ئٹ سرجم مس۔
"قبائلی ساخت آتا پوسکن ودی مننگ و بلوچستان"
دا جہان ٹی بندغ ہراتم شعوری زند ئنا بناء ءِ کرے تو نن خنینہ کہ او معاشرتی زند ئٹی چندی اصول ہیس و تینا زند ءِ مستی تدیفسہ کرے۔ برام، چنا، خاہوت ٹک و قبیلہ کل قبائلی ارتقاء نا بناء مس ہرا مستی ہنسا حکومت و ریاست جوڑ مریسہ کریر جہان نا تہذیب آتا خواننگ آن پد ننے خبر تمک کہ چنکا چنکا آبادی تا جند آک اولی انسانی معاشرتی ساخت ئسر ہندا وڑ مستی اوفتیٹی جوانو حکومت و ریاست جوڑ مریسہ کریر۔
پاکستان نا تاریخ ٹی بے دادی و جلہو نا اولی نشان مدام بلوچستان مریسہ کرینے 1948،1958،1964 اوکان پد 1973 ٹی ہم بلوچستان ظلم و بے دادی نا گواچی مسونے ہراٹی ظلم و زیاتی ٹی شیفی بڑزی بریسہ کرینے۔ پاکستان حکومت مدام ظلم کریسہ کرینے و تینا ظلم زیاتی تے ڈھکنگ کہ مدام کل آ بھرم ءِ سردار و سرداری نظام نا زی آ تخانے و تینے مدام ڈکیسہ کرینے۔ بلوچ آتا مُست ئنا شاعری ٹی سردار پنی آ لوز ننے بِننگ کن رسینگپک و نواب نا پنا ہم اینو باز آ بلوچ قبائل آک جوان وڑ ئٹ درستی افس مُست ئنا بلوچ شاعری ٹی ننے بھلنی تخوک آ بندغ کہ میر ئنا لوز نظر بریک۔
داسا نا بلوچستان ٹی بلوچ آتا جہی مننگ تو ہرے نا ارے ولے کل آن اول بلوچ آتا بھلا طائف آک میر جلال خان نا کماشی ٹی مکران ٹی تولوک مریرہ بلوچاتے کہ مالو سردار لوز نہ بلکن میر لوز لکھنگ مسونے میر جلال خان آن پد میر شہیک بلوچ آتا کماشی ءِ کرینے۔ میر شہیک نا کذیت آن پد رند و لاشار نا جنگ آک ودی مریرہ ہرا سی سال اسکان چلیسہ کیرہ او وخت رند آتا رہشونی ءِ میر چاکر خان و لاشار آتا رہشونی ءِ میر گواہرام کیک او وخت ہم بلوچ معاشرہ ٹی سردار نہ بلکن میر نا لوز کاریم ئٹ ہتنگک۔ خانہ جنگی نا بناء غان باز آ بلوچ قبائل آک سنھ و پنجاب آ مون کریر و رہینگوک آ قبائل ہرافتے ٹی مری، بگٹی، رند، ڈومکی، لہڑی و مگسی ئسر ہرا تینا وطن ءِ الیتوس ہندا قبائل تا رہینگ نا سوب آن بلوچستان تینا اینو نا پن تون و ہمے پجار تون زندہ سلوک ءِ۔ اگہ بلوچاک اے وخت اِلیسہ ہنیسہ کریرہ بلوچستان ءِ تو اینو تاریخ ٹی بلوجستان ءِ دن یات کریرہ کہ داڑے وختس بلوچاک رہینگارہ۔
برجاء ءِ
ReplyForward |
